མཁན་པོ་བསོད་དར་རྒྱས་ཀྱིས་བསྒྱུར།

སྔོན་དུ་འགྲོ་བའི་གཏམ།

སློབ་མའི་བསླབ་བྱ་འདི་ནི་ཆིན་རྒྱལ་རབས་ཀྱི་ཁང་ཤིས་རྒྱལ་པོའི་རིང་གི་སྙན་གྲགས་ཅན་གྱི་སློབ་གསོ་པ་ཆེན་པོ་ལིས་ཡེ་ཤོས་ཀྱིས་ཁུང་ཙི་སོགས་རུའུ་ཆོས་ཀྱི་བསླབ་བྱ་མང་པོ་ཕྱོགས་གཅིག་ཏུ་བསྡུས་ཏེ་བརྩམས་པ་ཡིན། སྔོན་རྒྱ་ནག་གི་ལོ་རྒྱུས་ཐོག་མི་རྣམས་འདི་དག་མི་ཤེས་པ་མེད་པ་ལྟ་བུ་ཡིན་ཡང་། ཕྱིས་སུ་རིག་གསར་གྱི་སྐབས་སློབ་གསོའི་བསྒྱུར་བཅོས་བྱས་ཏེ་ལིན་དགག་ཁུང་དགག་གི་འགུལ་བསྐྱོད་དྲག་པོ་སྤེལ་ནས་རང་གི་སྲོལ་རྒྱུན་རྩ་བ་ནས་བརླག་པར་བྱས། དེང་སང་ཤེས་ལྡན་མང་པོས་རང་གི་རིན་ཐང་ཅན་གྱི་རིག་གནས་གཞན་གྱིས་བེད་སྤྱོད་བྱེད་པ་དང་། རང་ཉིད་ནུབ་ཕྱོགས་ཀྱི་གད་སྙིགས་རིག་པ་ཙམ་ལ་ཡིད་རྟོན་པའི་ཉམ་ཐག་པའི་གནས་ཚུལ་མཐོང་སྟེ་བློ་ཐབས་སྣ་ཚོགས་ཀྱིས་བསྐྱར་གསོའི་བྱ་འགུལ་རྩོམ་གྱིན་ཡོད་ཀྱང་ཤི་ལ་ཐུག་པའི་ནད་པ་ཚབས་ཆེན་མྱུར་དུ་སོས་མི་ཐུབ་པ་བཞིན་གནས་སྐབས་དཀའ་བར་སྣང་ངོ་། །ཡིན་ན་ཡང་ད་སྐབས་འཇར་པན་དང་། ལྷོ་ཁོ་རེ་ཡ། སིང་གྷ་ཕོར་རྒྱལ་ཁབ་སོགས་ཀྱི་སློབ་གྲྭ་དང་ཁེ་ལས་ཚོགས་པ་གཙོས་མི་ཁྲི་ཕྲག་མང་པོས་འདི་ཉིད་སློབ་སྦྱོང་དང་ལག་བསྟར་བྱས་ཏེ་གྲུབ་འབྲས་ཆེན་པོ་ཐོབ་པར་བཤད། མ་ཟད་གསར་ཤོག་འགར་མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་སློབ་མའི་བསླབ་བྱ་འདི་དབྱིན་ཇི་དང་། ཧྥ་རན་སི། ཨུ་རུ་སུ། སི་ཕེན། ཨ་རབ་བཅས་ཀྱི་ཡི་གེར་བསྒྱུར་ཏེ་སློབ་དགོས་པའི་འབོད་བསྐུལ་བཏང་བར་བཤད། རུའུ་ཆོས་ཀྱི་གཞུང་འདི་དག་དང་། ཡེ་ཤུའི་ཆོས་ལུགས་ཀྱི་ལྷ་ཆེམས་ཞེས་པ་དང་། ཏའོ་ཆོས་ཀྱི་སྤྱོད་ལམ་བསྟན་པའི་མདོ་རྣམས་ལ་ཞིབ་ཏུ་བལྟས་ན་དེ་དག་གི་ནང་དོན་ལེགས་ཆ་ཐམས་ཅད་ནང་པའི་ལུགས་ཀྱི་བསྟན་བཅོས་དང་ལེགས་བཤད་སོགས་ཀྱི་ཆ་ཤས་སུ་འཁུམས་ཀྱང་འཛམ་གླིང་མི་དུང་ཕྱུར་མང་པོས་དད་ཅིང་ཉམས་ལེན་བྱེད་ཀྱིན་ཡོད། ལྷག་པར་དུ་རུའུ་ཆོས་ཀྱི་འགྲོ་བ་མིའི་རིགས་ཐམས་ཅད་ལ་ཕན་པར་བཤད་དེ། ༡༩༨༨ལོར་ཧྥ་རན་སིའི་རྒྱལ་ས་ཕེ་རིས་ནས་ཧན་ནི་སུ་ཨར་ཝེན་སོགས་ནོ་པེར་བྱ་དགའ་ཐོབ་མཁན་མི་བདུན་ཅུ་དོན་ལྔ་ཙམ་ཚོགས་ཏེ། ཕེ་རིས་བསྒྲགས་གཏམ་ཞེས་པའི་ནང་དུ་འགྲོ་བ་མིའི་རིགས་ཐམས་ཅད་དུས་རབས་ཉེར་གཅིག་པའི་ནང་དུ་འཚོ་བར་བྱེད་པ་ལ་ངེས་པར་དུ་ལོ་༢༥༠༠སྔོན་དུ་སོང་ནས་ཁུང་ཙིའི་བསམ་བློའམ་ཤེས་རབ་འཚོལ་སྡུད་བྱེད་དགོས་ཞེས་བཤད། ཁུང་ཙི་ནི་མཁས་པ་འགའ་རེས་ཀོང་ཙེ་འཕྲུལ་རྒྱལ་ཡིན་པར་ཡང་གསུངས། གང་ལྟར་ཡང་གཞུང་འདིར་ཐེག་ཆེན་ནས་བཤད་པའི་ལྟ་སྒོམ་ཟབ་མོ་སོགས་མེད་པར་མ་ཟད། ཚེ་སྔ་ཕྱི་ལས་རྒྱུ་འབྲས་ལྟ་བུའི་འཇིག་རྟེན་ཡང་དག་གི་ལྟ་བ་ཙམ་ཡང་མེད་མོད། སྤྱིར་འཚོ་བའི་རྒྱུན་ཤེས་ཀྱི་སྤྱོད་ལམ་མང་པོ་ཞིག་ཞིབ་གསལ་གྱི་སྒོ་ནས་གསུངས་པས། ད་ལན་རྒྱ་ནག་ཏུ་ཡོད་པའི་རྩ་འགྲེལ་མང་པོར་གཏུགས་ཏེ་བོད་སྐད་དུ་བསྒྱུར་བ་ཡིན། མོས་ལྡན་འགའ་ལ་གཞན་གྱི་རིག་པ་ལས་ངེས་ཤེས་གསར་བ་རེ་སྐྱེ་ན་ཡང་མི་ཆོག་པ་མེད་སྙམ་སྟེ། བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་ཞལ་ནས། གཟིགས་པར་དགོངས་རྣམས་ཅི་ནས་གཟིགས་མཛོད་དང་། །ལོ་རྒྱུས་རྙིང་བས་ངེས་ཤེས་གསར་བ་སྐྱེ། །གཟིགས་མ་དགོངས་ན་ཨུ་ཚུགས་ཅི་སྟེ་ཞུ། །ཀུན་ལ་བྲིན་སྙམ་རེ་བའང་བདག་ལ་མེད། །ཅེས་གསུངས་པ་ལྟར་རོ། །

སྒྱུར་བ་པོས་སྤྱི་ལོ་༢༠༡༠ཟླ་༣ཚེས་༥ལའོ། །

མགོ་བརྗོད།

སློབ་མའམ་བྱིས་པ་རྣམས་ཀྱིས་བསླབ་པར་བྱ་བའི་ལུགས་སྲོལ་བརྗོད་པའི་གཞུང་འདི་ཆིན་རྒྱལ་རབས་ཀྱི་གོང་མ་ཁང་ཤིས་རྒྱལ་པོའི་དུས་ཏེ། སྤྱི་ལོ་༡༦༦༢ལོ་ནས་༡༧༢༢ལོའི་བར་དུ་བྱུང་བའི་རྒྱ་ནག་གི་སྙན་གྲགས་ཅན་གྱི་མཁས་པ་དང་སློབ་གསོ་པ་ལིས་ཡེ་ཤོས་ཞེས་པས་བརྩམས་ཤིང་། བརྗོད་བྱ་ནི་སློབ་མའམ་བྱིས་པ་རྣམས་ཁྱིམ་དུ་སྡོད་པ་དང་ཕྱི་རོལ་ཏུ་འགྲོ་བའི་གནས་སྐབས་སོགས་སུ་བསྒྲུབ་པར་བྱ་དགོས་པའི་ཡ་རབས་ཀྱི་ལུགས་སྲོལ་བཟང་པོ་རྣམས་ཡིན་ལ། རྗོད་བྱེད་དོན་ཚན་བདུན་དུ་ཕྱེ་ནས་སྟོན་པར་བྱེད། གཞུང་འདི་ཆིན་རྒྱལ་རབས་ནས་བཟུང་དུས་རབས་ཉི་ཤུ་པའི་འགོ་ཙམ་གྱི་བར་དུ་རྒྱ་ནག་ན་བྱིས་པ་རྣམས་ཀྱི་བློ་སྒོ་འབྱེད་པའི་བསླབ་གཞི་བཟང་ཤོས་ཤིག་ཏུ་བྱེད། དུས་རབས་ཉི་ཤུ་པའི་དཀྱིལ་དང་སྨད་དུ་རྒྱ་ནག་རང་གི་སྲོལ་རྒྱུན་གྱི་རིག་གནས་ཐམས་ཅད་རང་གིས་རྩ་གཏོར་བྱས་པས་འཆད་ཉན་བྱེད་མཁན་མེད་པར་གྱུར། ད་ལྟ་སླར་ཡང་སྲོལ་རྒྱུན་གྱི་རིག་གནས་དེ་རྣམས་དེང་རབས་ཀྱི་སྤྱི་ཚོགས་འདི་ལ་ཤིན་ཏུ་མཁོ་བར་མཐོང་ནས་ཁྱབ་སྤེལ་བྱེད་བཞིན་པ་ལགས་སོ། །ད་ལན་བོད་ཀྱི་ལོ་ཙཱ་བ་མཁན་པོ་བསོད་དར་རྒྱས་ཀྱིས་གཞུང་འདི་བོད་ཡིག་ཏུ་བསྒྱུར་པར་མ་ཟད་ཚིག་འགྲེལ་ཉུང་ངུ་ཞིག་ཀྱང་མཛད་འདུག་པས་ཁ་གསལ་དོན་འདུས་སུ་སོང་ནས་འཆད་ཉན་སྟབས་བདེ་བར་འདུག བརྗོད་བྱ་འདི་རྣམས་རང་རེའི་རིག་གཞུང་གི་ཁྲོད་ན་ཡ་རབས་ཀྱི་ལུགས་སྲོལ་སྟོན་པའི་བསྟན་བཅོས་ཤིན་ཏུ་མང་པོ་ཡོད་པ་རྣམས་ཀྱི་ནང་དུ་མ་འདུས་པ་མི་འདུག་མོད། འོན་ཀྱང་འདི་སློབ་མའམ་བྱིས་པ་རྣམས་ལ་ཆེད་དུ་དམིགས་ནས་གདམས་པ་ཡིན་པས་དེ་རྣམས་ལ་དགོས་པ་དམིགས་བསལ་བ་ཡོད་པས་སློབ་སྦྱོང་བྱས་ན་ལེགས་ཤིང་། གཞན་གྱི་རིག་གནས་ཀྱི་ལེགས་ཆ་ལེན་པ་ནི་རང་ཡར་རྒྱས་སུ་འགྲོ་བའི་ཐབས་ཡིན་པས་འདིར་རྗེས་སུ་ཡི་རང་ཞུ་བ་ཡིན་ནོ། །སྤྱིར་མི་རིགས་གང་ཞིག་ཡིན་ཡང་རུང་དེའི་མདུན་ལམ་དེ་བུ་ཕྲུག་ཚོ་ཆུང་ངུའི་དུས་ནས་ཡ་རབས་ཀྱི་ལུགས་སྲོལ་བཟང་པོ་ལ་གོམས་པ་དང་རིག་པའི་གནས་ལ་སྦྱང་དུ་འཇུག་པའི་སློབ་གསོ་འདི་ཁོ་ན་ལ་རག་ལས་ཡོད་པས་མེད་ཐབས་གཏན་ནས་མེད་པ་ཞིག་ཡིན། དེས་ན་སློབ་གྲྭའི་དགེ་རྒན་དང་ཕ་མ་སོགས་ཀྱིས་འདིའི་ཕྱོགས་ལ་སེམས་ཁུར་དང་འབད་པ་ནམ་ཡང་མི་ལྷོད་པ་ཞིག་གལ་ཆེའོ། །

བོད་རབ་རྒྱན་ལྕགས་སྟག་ལོའི་དགུན་ཟླ་བའི་ཚེས་༡༥ཉིན་གྲོང་ཁྱེར་པདྨ་ཅན་དུ་ཚུལ་ཁྲིམས་བློ་གྲོས་ཀྱིས་སྨྲས་པའོ། །

དཀར་ཆག

སློབ་མའི་བསླབ་བྱ།

སྤྱིའི་སྡོམ་ཚིག

སློབ་མའི་བསླབ་བྱ་འདི། །

འཕགས་པའི་སྐྱེ་བོའི་གསུང་། །

སྲི་ཞུ་གུས་བཀུར་དང༌། །

བག་ཡོད་ཡིད་རྟོན་བྱ། །

ཀུན་ལ་བྱམས་པས་སྐྱོང༌། །

བཤེས་གཉེན་དམ་པ་བསྟེན། །

ད་དུང་སྒྲུབ་ནུས་ན། །

ཤེས་བྱ་གཞན་ཀྱང་སློབ། །

དང་པོ། ནང་དུ་ཕ་མར་སྲི་ཞུའི་སྐོར།

ཕ་མས་འབོད་པའི་དུས། །

མྱུར་དུ་ཨ་ལན་བྱ། །

ཕ་མས་མངག་པའི་ལས། །

ཕྱིར་འགྱངས་མེད་པར་བསྒྲུབ། །

ཕ་མའི་བསླབ་བྱ་དག །

གུས་པས་མཉན་པར་བྱ། །

ཕ་མས་བཀའ་བཀྱོན་སྐབས། །

བཀུར་བས་དང་ལེན་བྱ། །

དབྱར་དགུན་ཕ་མ་ལ། །

དྲོད་བསིལ་གང་དགོས་སྦྱིན། །

ནངས་ནུབ་ཕ་མ་ལ། །

ཁམས་འདྲི་བསྙེན་བཀུར་ཞུ། །

ཕར་འགྲོ་ཕ་མར་ཞུ། །

ཚུར་སླེབས་སྙན་གསན་དབུལ། །

སྡོད་གནས་གཏན་འཁེལ་དང༌། །

ལས་ཀ་བརྟན་པོ་བྱ། །

བྱ་བ་ཆུང་ན་ཡང༌། །

རང་དགར་བྱེད་མི་རུང༌། །

རང་དགར་བྱས་གྱུར་ན། །

ཡ་རབས་ལུགས་དང་འགལ། །

དངོས་པོ་ཆུང་ན་ཡང༌། །

རང་དགར་སྦ་མི་རུང༌། །

རང་དགར་སྦས་གྱུར་ན། །

ཕ་མའི་སེམས་པ་གསོད། །

ཕ་མ་དགའ་བའི་གནས། །

ཅི་ནུས་བསྒྲུབ་པར་བྱ། །

ཕ་མ་མི་དགའི་རིགས། །

བག་ཡོད་སྒོ་ནས་འདོར། །

ལུས་ལ་སྙད་བྱུང་ན། །

ཕ་མས་སེམས་ཁྲལ་བྱེད། །

ཀུན་སྤྱོད་ཉམས་གྱུར་ན། །

ཕ་མར་ངོ་ཚ་སྐྱེ། །

ཕ་མ་དགའ་ན་བདག །

བཀུར་སྟི་ཅི་ཞིག་དཀའ། །

ཕ་མ་སྡང་ཡང་བདག །

གུས་བཀུར་དེ་ནི་མཆོག །

ཕ་མའི་ཉེས་སྐྱོན་ལ། །

ཞི་དུལ་འཛུམ་མདངས་བཅས། །

འཇམ་པོའི་ངག་ཚིག་གིས། །

བསྐུལ་ཏེ་བཅོས་པར་བྱ། །

སྐྱོན་ངོས་མི་ལེན་ན། །

ཕ་མ་དགའ་བའི་དུས། །

ངུས་ཏེ་སླར་ཡང་ཞུ། །

བརྡུངས་ཀྱང་འཁོན་མི་བྱ། །

ཕ་མ་ན་བའི་དུས། །

སྨན་བྲོ་རང་གིས་བལྟ། །

ཉིན་མཚན་བསྙེན་བཀུར་ཞུ། །

གམ་ནས་འབྲལ་མི་བྱ། །

ཕ་མ་གཤེགས་རྗེས་སུ། །

ལོ་གསུམ་མྱ་ངན་བྱེད། །

འཚོ་བ་སྟབས་བདེའི་ངང༌། །

ཤ་ཆང་སོགས་མི་བསྟེན། །

ལྷག་བསམ་དག་པའི་ངང༌། །

སྲོལ་བཞིན་འདས་མཆོད་བྱ། །

འདས་རྗེས་བྱ་གཞག་རྣམས། །

འཚོ་གཞེས་སྐབས་ལྟར་བྱ། །

གཉིས་པ། རྒན་ལ་གུས་བཀུར་གྱི་སྐོར།

ཕུ་བོས་ནུ་བོ་སྐྱོང༌། །

ནུ་བོས་ཕུ་བོར་གུས། །

ཕུ་ནུ་ནང་མཐུན་ན། །

ཕ་མའི་སྲི་ཞུ་ལགས། །

ནོར་ལ་ཞེན་ཆུང་ན། །

འཁོན་པ་གང་ནས་འབྱུང༌། །

གཏམ་ངན་ལ་བཟོད་ན། །

ཁྲོ་སེམས་རང་སར་ཞི། །

བཟའ་བཏུང་བྱེད་པ་དང༌། །

འགྲོ་འདུག་སོགས་ཀྱང་རུང༌། །

རྒན་རབས་སྔོན་ལ་སྟེ། །

གཞོན་པས་རྗེས་ནས་བྱ། །

རྒན་པས་གཞན་འབོད་ན། །

མྱུར་དུ་འཚོལ་རོགས་བྱ། །

མི་དེ་མེད་གྱུར་ན། །

རང་ཉིད་དེའི་ཚབ་འགྲོ། །

རྒན་ལ་ཞེ་ས་བགྱི། །

ཐད་ཀར་མིང་མི་གཟུང༌། །

རྒན་རབས་དག་གི་མདུན། །

རང་ཆེ་གདོན་མི་བྱ། །

ལམ་འཕྲད་རྒན་རབས་ལ། །

མྱུར་དུ་གུས་འདུད་ཞུ། །

གསུང་གླེང་མེད་གྱུར་ན། །

གུས་པས་གམ་དུ་གཟུར། །

རྒན་རབས་ལ་འཕྲད་སྐབས། །

ཁྱོགས་རྟ་སོགས་ལས་འབབ། །

གོམ་བརྒྱ་ཙམ་ཕེབས་རྗེས། །

གཟོད་ནས་ལམ་དུ་ཞུགས། །

རྒན་པ་བཞེངས་པའི་དུས། །

གཞོན་པ་འདུག་མི་རུང༌། །

རྒན་པ་བཞུགས་པའི་རྗེས། །

གནང་ན་གཟོད་ནས་འདུག །

རྒན་པ་རྣམས་ཀྱི་དྲུང༌། །

སྐད་སྒྲ་ཆེ་མི་རུང༌། །

ཆུང་ནས་མི་ཐོས་པ། །

དེ་ཡང་མ་ཡིན་ནོ། །

མདུན་ལ་མྱུར་བོས་གཅར། །

དལ་གྱིས་ཕྱིར་ལ་འོངས། །

ཐད་ཀར་དྲིས་ལན་ལྡོན། །

ལྟ་སྟངས་བསྒྱུར་མི་བྱ། །

ཉེ་བའི་རྒན་རབས་ལ། །

རང་གི་ཕ་ལྟར་བཀུར། །

ཉེ་བའི་སྤུན་ཟླ་ལ། །

རང་གི་སྤུན་ལྟར་གཅེས། །

གསུམ་པ། བག་ཡོད་ཚུལ་མཐུན་གྱི་སྐོར།

ཞོགས་པར་སྔ་ནས་ལངས། །

དགུང་མོར་ཕྱི་ནས་ཉལ། །

རྒ་བ་འོང་སླ་བས། །

དུས་ལ་གཅེས་སྤྲས་བྱ། །

སྔ་མོར་ཡར་ལངས་ཏེ། །

ངོ་འཁྲུད་ཁ་བཤལ་ཞིང། །

བཤང་གཅི་དོར་བའི་རྗེས། །

ལག་པ་བཀྲུ་བར་བྱ། །

ཞྭ་མོ་དྲང་མོར་གྱོན། །

སྒྲོག་གུ་ལེགས་པར་སྒྲོག།།

གོས་ལྷམ་ཆ་འགྲིག་པོ། །

འོས་འཚམས་ཡིད་འོང་བྱ། །

ཞྭ་གོས་སོགས་ཕུད་རྗེས། །

གཏན་ཁེལ་གནས་སུ་འཇོག །

གང་མོས་སར་གཡུག་ན། །

དེ་ལས་བཙོག་པར་འགྱུར། །

གོས་ནི་གཙང་བ་གཙོ། །

ཁྲ་བོ་སོགས་མ་ཡིན། །

རང་གི་ཐོབ་ཐང་དང༌། །

ཁྱིམ་གྱི་རྒྱུ་ལ་བསྟུན། །

བཟའ་བཏུང་སྤྱོད་པའི་དུས། །

འདེམ་ག་བྱེད་མི་རུང༌། །

ཟས་སྤྱོད་རན་པ་ལས། །

ཚད་ལས་འདས་པ་མིན། །

ན་ཚོད་གཞོན་དུས་ནས། །

ཆང་ནི་བཏུང་མི་རུང༌། །

ཆང་གིས་བཟི་བའི་མིའི། །

ཀུན་སྤྱོད་ཆེས་ཐ་ཆད། །

འགྲོ་ན་གོམ་སྟབས་རན། །

འགྲེང་དུས་ལུས་པོ་དྲང༌། །

ཕྱག་ལ་ལུས་སྒུར་ཏེ། །

གུས་འདུད་བརྩི་བཀུར་བྱ། །

སྒོ་ཐེམ་ཐོག་མི་བརྫི། །

རྐང་གཅིག་གིས་འགྲེང་དང༌། །

རྐང་གཉིས་བགྲད་དེ་འདུག །

བརླ་གཡུག་སོགས་མི་བྱ། །

ཡོལ་བ་དལ་གྱིས་ཕྱེ། །

སྒྲ་ཆེན་སོགས་མི་འབྱིན། །

ཁ་འཁོར་རྒྱང་ནས་བསྐོར། །

སྣེ་ཟུར་ཕོག་མི་བྱ། །

སྣོད་སྟོང་གཟུང་བའི་སྐབས། །

བཅུད་ལྡན་གཟུང་བཞིན་གཟབ། །

ཁང་སྟོང་ནང་ཞུགས་དུས། །

ཁྱིམ་བདག་ཡོད་བཞིན་བྱ། །

བྱ་བ་བྲེལ་མི་རུང༌། །

བྲེལ་ན་ནོར་འཁྲུལ་འབྱུང༌། །

དཀའ་ལ་སྐྲག་པ་དང༌། །

སླ་ལ་བརྙས་མི་བྱ། །

འཐབ་རྩོད་གཡེང་བའི་གནས། །

ནམ་ཡང་འགྲོ་མི་རུང༌། །

ཚུལ་མིན་ལོག་པའི་དོན། །

ནམ་ཡང་འདྲི་མི་བྱ། །

གཞན་ཁྱིམ་འགྲོ་བའི་དུས། །

ཁྱིམ་བདག་ཡོད་མེད་འདྲི། །

ཁང་པར་ཞུགས་པའི་ཚེ། །

སྐད་བརྡ་གཏོང་བར་བྱ། །

བདག་པོས་ཚུར་འདྲི་ན། །

རང་གི་མིང་ནས་བརྗོད། །

ང་ཡིན་ཞེས་པའི་སྒྲས། །

སུ་ཡིན་འབྱེད་མི་ནུས། །

གཞན་ནོར་ལ་སྤྱོད་ན། །

དྲིས་ཏེ་གནང་བ་དགོས། །

མ་དྲིས་བཞིན་སྤྱད་ན། །

བརྐུས་དང་ཁྱད་པར་མེད། །

བདག་གིས་གཡར་བའི་ནོར། །

དུས་ཐོག་ཕར་ལ་སྤྲད། །

གཞན་ལ་གཡར་དགོས་ན། །

སེར་སྣ་མེད་པས་གཡར། །

བཞི་པ། ཡིད་རྟོན་དྲང་བདེན་གྱི་སྐོར།

སྐད་ཆ་གང་བཤད་ཀྱང༌། །

དྲང་བདེན་ཡིད་རྟོན་གཙོ། །

རྫུན་དང་གཡོ་སྒྱུའི་ཚིག །

ནམ་ཡང་སྨྲ་མི་བྱ། །

འཆོལ་གཏམ་མང་བ་ལས། །

སྐད་ཆ་ཉུང་ན་དགའ། །

ཁ་ཚིག་དོན་གནས་ལས། །

བསླུ་ཚིག་སྨྲ་མི་བྱ། །

ཁ་ཡག་ཚིག་སྙན་དང༌། །

མ་རབས་ཐ་ཆད་པའི། །

གྲོང་ཚིག་གཏམ་ངན་སོགས། །

ནམ་ཡང་སྨྲ་མི་བྱ། །

གནས་ལུགས་མ་མཐོང་བར། །

གང་འདོད་བཤད་མི་རུང༌། །

ཁུངས་དག་མ་ཤེས་པར། །

གཞན་ལ་བསྒྲག་མི་བྱ། །

ཡང་དག་མིན་པའི་དོན། །

རང་དགར་ཁས་མི་བླངས། །

རང་དགར་ཁས་བླངས་ན། །

འཇུག་ལྡོག་གཉིས་ཀ་དཀའ། །

སྐད་ཆ་འཆད་པའི་དུས། །

གསལ་དག་ལྷོད་ཆགས་དགོས། །

ཧ་ཅང་མགྱོགས་པ་དང༌། །

ལྡབ་ལྡིབ་སོགས་མི་བྱ། །

འདི་བཟང་འདི་ངན་ཞེས། །

སྐྱོན་ཡོན་མི་བརྗོད་ཅིང༌། །

རང་དང་འབྲེལ་མེད་པའི། །

བྱ་བར་འཇུག་མི་བྱ། །

གཞན་ཡོན་མཐོང་བའི་ཚེ། །

དེ་ཡི་རྗེས་བསྙེག་བསམ། །

ད་དུང་ཐག་རིང་ཡང་། །

རིམ་གྱིས་དེ་རྗེས་ཟིན། །

གཞན་སྐྱོན་མཐོང་བའི་ཚེ། །

རང་ལ་ཡོད་མེད་བརྟག །

རང་སྐྱོན་ཡོད་ན་བཅོས། །

མེད་ན་བག་ཟོན་བྱ། །

སྤྱོད་བཟང་ཤེས་རིག་དང༌། །

ལག་རྩལ་ཡོན་ཏན་རྣམས། །

གཞན་ལྟར་མི་ལྡན་ན། །

རང་ལ་བསྐུལ་ཏེ་བསྐྲུན། །

ལུས་ཀྱི་ཆས་གོས་དང༌། །

བཟའ་བཏུང་ཡོ་བྱད་སོགས། །

གཞན་ལྟར་མི་ལྡན་ན། །

སེམས་པ་སྐྱོ་མི་བྱ། །

སྨད་ན་ཁྲོ་འགྱུར་ཞིང༌། །

བསྟོད་ན་དགའ་འགྱུར་བའི། །

མི་ལ་གྲོགས་ངན་འདུ། །

གྲོགས་བཟང་བྲེད་ནས་འགྲོ། །

བསྟོད་ན་སྐྲག་འགྱུར་ཞིང༌། །

སྨད་ན་དགའ་འགྱུར་བའི། །

མི་ལ་དམ་པ་རྣམས། །

རིམ་གྱིས་འདུ་བར་འགྱུར། །

མ་བརྟགས་བྱ་ངན་བྱས། །

དེ་ལ་ནོར་འཁྲུལ་ཟེར། །

བསམ་བཞིན་བྱ་ངན་བྱས། །

དེ་ནི་མི་དགེ་ཡིན། །

རང་སྐྱོན་བཅོས་གྱུར་ན། །

ཡོན་ཏན་འཕེལ་བར་འགྱུར། །

རང་སྐྱོན་བཀབ་གྱུར་ན། །

ཉེས་པ་ཇེ་ཆེར་འགྲོ། །

ལྔ་པ། ཀུན་ལ་བྱམས་སྐྱོང་གི་སྐོར།

གང་ཟག་སུ་ཡིན་ཡང༌། །

ངེས་པར་བྱམས་པས་སྐྱོང༌། །

ས་སྟེང་གནམ་འོག་ན། །

མཉམ་དུ་གནས་པས་སོ། །

སྤྱོད་བཟང་ལྡན་པའི་མིའི། །

མཚན་སྙན་ངང་གིས་འཕེལ། །

མི་རྣམས་དེ་ལ་གུས། །

མཛེས་པའི་གཟུགས་ཀྱིས་མིན། །

ཤེས་ཡོན་ལྡན་པའི་མིའི། །

མཚན་སྙན་ངང་གིས་རྒྱས། །

མི་རྣམས་དེ་ལ་དགའ། །

རང་བསྟོད་བསྔགས་པས་མིན། །

རང་གི་ཡོན་ཏན་གྱིས། །

རང་དོན་བསྒྲུབ་མི་བྱ། །

གཞན་གྱི་ཡོན་ཏན་ལ། །

ཁྱད་གསོད་བྱེད་མི་རུང༌། །

ཕྱུག་པོར་ངོ་བསྟོད་དང༌། །

དབུལ་པོར་ཁེངས་དྲེགས་མིན། །

གྲོགས་རྙིང་འདོར་བ་སྤང༌། །

གྲོགས་གསར་དགའ་ཞེན་མིན། །

གཞན་དག་བྲེལ་བའི་དུས། །

ལས་འགོག་བྱེད་མི་རུང༌། །

གཞན་སེམས་སྐྱོ་བའི་དུས། །

གཏམ་ཉོག་སྨྲ་མི་བྱ། །

གཞན་གྱི་སྐྱོན་ཆ་རྣམས། །

ངེས་པར་བསྒྲག་མི་རུང༌། །

གཞན་གྱི་གསང་བ་རྣམས། །

ནམ་ཡང་སྨྲ་མི་བྱ། །

གཞན་གྱི་ཡོན་ཏན་རྣམས། །

བརྗོད་ན་དགེ་བ་ཡིན། །

གཞན་གྱིས་ཤེས་པའི་རྗེས། །

བརྩོན་པས་ཇེ་བཟང་འགྲོ། །

གཞན་གྱི་ཉེས་སྐྱོན་རྣམས། །

བསྒྲགས་ན་མི་དགེའི་ལས། །

བརྗོད་པ་ཐལ་དྲགས་ན། །

ཉེར་འཚེ་རང་ལ་འབྱུང༌། །

གྲོགས་ལ་ཕན་ཚུན་བསྐུལ། །

མཉམ་དུ་ཤེས་ཡོན་བསྐྲུན། །

ཚུལ་མིན་ལམ་ཞུགས་ན། །

ཐ་མ་གཉིས་ཀ་ཕུང་། །

དངོས་རྫས་གཏོང་ལེན་ལ། །

དབྱེ་འབྱེད་གསལ་བོར་བྱ། །

ཕར་གཏོང་མང་བ་དང༌། །

ཚུར་ལེན་ཉུང་ན་ལེགས། །

གཞན་ལ་བཅོལ་པའི་ལས། །

ཐོག་མར་རང་ལ་འདྲི། །

རང་གིས་མི་འདོད་ན། །

མྱུར་དུ་མཚམས་འཇོག་བྱ། །

དྲིན་ལ་གཟོ་སེམས་དང༌། །

འཁོན་ལ་བརྗེད་སེམས་དགོས། །

གནོད་ལན་ཡུན་ཐུང་ཙམ། །

དྲིན་ལན་ཡུན་རིང་གཟོ། །

རང་གི་གཡོག་འཁོར་ལ། །

དྲང་བདེན་སྤྱོད་པས་སྐྱོང༌། །

དྲང་ཞིང་བདེན་ལས་ཀྱང༌། །

བྱམས་བརྩེ་ཁོག་ཡངས་གཙོ། །

དབང་ཆས་གཞན་མནན་ན། །

སྙིང་ནས་དང་ལེན་མེད། །

རྒྱུ་མཚན་ལྡན་གྱུར་ན། །

དེ་ལ་ལེ་བརྡ་མེད། །

དྲུག་པ། སྐྱེ་བོ་དམ་པ་བསྟེན་པའི་སྐོར།

མི་རྣམས་འདྲ་ན་ཡང༌། །

རིགས་ལ་སྣ་ཚོགས་ཡོད། །

ཐ་ཤལ་དམན་པ་མང༌། །

དམ་པའི་སྐྱེ་བོ་ཉུང༌། །

ཤེས་ལྡན་དམ་པ་ལ། །

ཐམས་ཅད་གུས་ཤིང་སྐྲག །

དེས་ཀྱང་རྫུན་ཚིག་དང༌། །

གཡོ་སྒྱུས་བསླུ་མི་སྲིད། །

དམ་པ་བསྟེན་བྱས་ན། །

ལེགས་ཚོགས་དཔག་མེད་འབྱུང༌། །

ཡོན་ཏན་ཉིན་བཞིན་འཕེལ། །

ཉེས་སྐྱོན་ཉིན་བཞིན་འགྲིབ། །

དམ་པ་དོར་གྱུར་ན། །

ཉེས་ཚོགས་དཔག་མེད་འབྱུང༌། །

དམན་པས་གླགས་རྙེད་ནས། །

དོན་ཀུན་བརླག་པར་འགྱུར། །

བདུན་པ། ཤེས་རིག་གཞན་བསླབ་པའི་སྐོར།

ལག་བསྟར་མི་བྱེད་པའི། །

རིག་པ་སློབ་པ་ཙམ། །

གསོབ་པའི་རང་བཞིན་ལས། །

བཟང་པོར་འགྱུར་མི་སྲིད། །

ལག་ལེན་ཁོ་ན་ལས། །

རིག་པ་མི་སློབ་ན། །

རང་ལྟ་མཁྲེགས་བཟུང་དེས། །

གནས་ལུགས་མཐོང་མི་སྲིད། །

ཡི་གེ་སློབ་པའི་སྐབས། །

གནད་གསུམ་ཚང་དགོས་ཏེ། །

སེམས་གཏད་མིག་གིས་བལྟ། །

ཁ་ནས་འདོན་པར་བྱ། །

དཔེ་གང་ཀློག་པའི་ཚེ། །

དཔེ་གཞན་བཀླག་མི་བྱ། །

འདི་ཉིད་མ་རྫོགས་པར། །

དེ་ཉིད་འགྲུབ་མི་འགྱུར། །

སློབ་ཡུན་རིང་བ་དང༌། །

སློབ་དུས་དམ་འཛིན་བྱ། །

བརྩོན་འགྲུས་རྒྱུན་བསྐྱངས་ན། །

དཀའ་གནད་མ་ལུས་རྟོགས། །

སེམས་ཀྱི་དོགས་པ་རྣམས། །

དུས་སུ་ཟིན་ཐོར་བཀོད། །

གཞན་ལ་དྲིས་ནས་སུ། །

དེའི་དོན་རྟོགས་པར་བྱ། །

ཁང་ཁྱིམ་རྩིག་པ་དག །

ཕྱི་ནང་གཙང་སྦྲ་བྱ། །

མདུན་ཅོག་སྣག་སྨྱུག་སོགས། །

ཡིད་འོང་གྲ་འགྲིག་གཞག །

བརྡར་སྣག་ཡོ་གྱུར་ན། །

བློ་སེམས་གཡེང་བ་ཡིན། །

ཡིག་གཟུགས་མི་འགྲིག་ན། །

སེམས་ཉིད་རྙོག་པའི་རྟགས། །

དཔེ་དེབ་གོ་རིམ་བཞིན། །

གཞག་ས་གཏན་ཁེལ་བྱ། །

དེབ་གང་བཀླགས་ཚར་རྗེས། །

སླར་ཡང་རང་སར་གཞག །

བྲེལ་བའི་དོན་བྱུང་ཡང༌། །

དཔེ་དེབ་ཚགས་འགྲིག་བྱ། །

དེབ་ལ་སྙད་བྱུང་ན། །

མྱུར་དུ་གསོ་བར་བྱ། །

འཕགས་པའི་གཞུང་མིན་པར། །

ལྟ་ཀློག་བྱེད་མི་རུང༌། །

བྱས་ན་ཤེས་རབ་བསྒྲིབ། །

ཕུགས་འདུན་བརླག་པར་འགྱུར། །

རང་ཉིད་དམའ་འབེབས་དང༌། །

གཉོམ་ཆུང་བྱེད་མི་རུང༌། །

རིམ་གྱིས་བརྩོན་བྱས་ན། །

མཁས་པའི་གོ་སར་སླེབས། །